У Міністэрстве абароны Расіі заявілі, што працягваюць «паспяхова абараняцца» на Данецкім, Чырвон-Ліманскім і Паўднёва-Данецкім напрамках. Ва ўкраінскім Генштабе паведамілі, што расійскія войскі на Ліманскім напрамку спрабавалі выцесніць УСУ з займаных пазіцый на захад ад Кармазінаўкі Луганскай вобласці. У амерыканскім Інстытуце па вывучэнні вайны адзначаюць, што Лукашэнка імкнецца дыстанцыявацца ад угоды, якая была заключаная з яго пасярэдніцтвам паміж Уладзімірам Пуціным і Яўгенам Прыгожыным.
Расказваем пра галоўнае са зводак штабоў і высноваў экспертаў на 499-ы дзень вайны ва Украіне.
Генштаб УСУ: Цвёрда трымаем абарону на Купянскім напрамку
За мінулыя суткі армія Расіі нанесла ракетныя ўдары па Украіне, выкарыстаўшы 11 крылатых ракет «Калібр». Сем з іх былі знішчаныя, тры ракеты трапілі па горадзе Львоў і адна — па прыватным доме ў Чаркаскай вобласці. Ёсць загінулыя і пацярпелыя сярод мірнага насельніцтва. Генштаб УСУ ў ранішняй зводцы таксама паведамляе, што, акрамя таго, праціўнік нанёс 57 авіяцыйных удараў і правёў 67 абстрэлаў з рэактыўных сістэм залпавага агню.
— Расійская армія працягвае засяроджваць асноўныя намаганні на Ліманскім, Бахмуцкім, Аўдзееўскім і Мар'інскім напрамках — за мінулыя суткі тут адбылося 30 баявых сутыкненняў.
— На Северскім і Слабажанскім напрамках праціўнік нанёс авіяўдар у раёне Гацішча Харкаўскай вобласці. Абстраляў з мінамётаў і артылерыі больш за 15 населеных пунктаў Сумскай і Харкаўскай абласцей.
— На Купянскім напрамку УСУ цвёрда трымаюць абарону. Артылерыйскім і мінамётным абстрэлам праціўніка падвергліся шэсць населеных пунктаў Харкаўскай вобласці.
— На Ліманскім напрамку цягам дня пры падтрымцы авіяцыі расійскія войскі рабілі спробы выцесніць Сілы абароны з займаных пазіцый на захад ад Кармазінаўкі Луганскай вобласці, але поспеху не мелі. Нанеслі авіяцыйныя ўдары каля пяці населеных пунктаў Луганскай і Данецкай абласцей, абстралялі больш за 15.
— На Бахмуцкім напрамку пад шчыльным агнём авіяцыі і артылерыі расійскай арміі УСУ адбілі атакі праціўніка ў раёне населенага пункта Бярхоўка Данецкай вобласці. Праціўнік нанёс авіяцыйны ўдар у раёне Іванаўскага, абстраляў з артылерыі больш за 20 населеных пунктаў Данецкай вобласці. Разам з тым Сілы абароны працягваюць весці наступальныя дзеянні на поўдзень і поўнач ад горада Бахмут, замацоўваюцца на дасягнутых рубяжах.
— На Аўдзееўскім напрамку УСУ працягваюць стрымліваць наступ расійскіх войскаў у раёне Першамайскага Данецкай вобласці. Армія РФ нанесла авіяўдары ў раёнах Новакалінава і Аўдзееўкі Данецкай вобласці, абстраляла больш за 15 населеных пунктаў Данецкай вобласці.
— На Мар'інскім напрамку УСУ адбілі ўсе расійскія атакі ў раёне горада Мар'інка. Праціўнік нанёс авіяцыйны ўдар каля Краснагораўкі, абстраляў больш за 10 населеных пунктаў Данецкай вобласці.
— На Шахцёрскім напрамку расійскія войскі вялі беспаспяховыя наступальныя дзеянні ў раёне Новаміхайлаўкі Данецкай вобласці. Нанеслі авіяцыйны ўдар каля Вуглядара, абстралялі больш за 15 населеных пунктаў Данецкай вобласці.
— На Запарожскім і Херсонскім напрамках войска РФ засяроджвае асноўныя намаганні на недапушчэнні прасоўвання ўкраінскіх войскаў. Нанесла авіяцыйныя ўдары ў раёнах сямі населеных пунктаў Данецкай, Запарожскай і Херсонскай абласцей, з артылерыі абстраляла больш за 30 населеных пунктаў Запарожскай, Днепрапятроўскай, Херсонскай вобласці і горад Херсон.
— Сілы абароны Украіны працягваюць вядзенне наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах.
— Авіяцыя Сіл абароны за мінулыя суткі нанесла восем удараў па раёнах канцэнтрацыі асабовага складу праціўніка і адзін — па зенітна-ракетным комплексе праціўніка.
— Падраздзяленні ракетных войскаў і артылерыі пабілі раён канцэнтрацыі жывой сілы, узбраення і ваеннай тэхнікі праціўніка, склад боепрыпасаў, шэсць артылерыйскіх сродкаў на агнявых пазіцыях і тры станцыі радыёэлектроннай барацьбы.
Мінабароны Расіі: Збілі самалёт Су-25 Паветраных сіл Украіны
«Цягам сутак Узброеныя сілы Украіны працягвалі беспаспяховыя спробы наступу на Данецкім, Чырвона-Ліманскім і Паўднёва-Данецкім напрамках», — заявілі ў Міністэрстве абароны Расіі.
— На Данецкім напрамку падраздзяленні Паўднёвай групоўкі войскаў адбілі дзесяць атак УСУ ў раёнах населеных пунктаў Маёрск, Паўночнае, Ягаднае, Кляшчэеўка, Першамайскае і Вадзяное Данецкай вобласці.
— На Чырвона-Ліманскім напрамку падраздзяленні групоўкі войскаў «Цэнтр» нанеслі паражэнне жывой сіле і тэхніцы 21-й і 67-й механізаваных брыгад УСУ ў раёнах населеных пунктаў Неўскае і Чырвоная Дзіброва Луганскай вобласці. Адбітыя чатыры атакі УСУ ў раёнах населеных пунктаў Новаягораўка, Новавадзяное Луганскай вобласці і Ямпалоўка Данецкай вобласці. Таксама ў раёне населенага пункта Чырвоная Дзіброва Луганскай вобласці спыненая дзейнасць дзвюх украінскіх дыверсійна-разведвальных груп.
— На Паўднёва-Данецкім напрамку агнём артылерыі і цяжкіх агнямётных сістэм групоўкі войскаў «Усход» адбітыя дзве атакі праціўніка ў раёне населенага пункта Ураджайнае Данецкай вобласці. У раёне населенага пункта Прыютнае Запарожскай вобласці спыненая дзейнасць украінскай дыверсійна-разведвальнай групы.
— На Запарожскім напрамку нанесенае паражэнне жывой сіле і тэхніцы 106-й брыгады тэрытарыяльнай абароны ў раёне населенага пункта Лугаўское Запарожскай вобласці. У раёне горада Арэхаў Запарожскай вобласці знішчаны склад боепрыпасаў 44-й артылерыйскай брыгады УСУ.
— На Купянскім напрамку аператыўна-тактычнай і армейскай авіяцыяй, артылерыяй Заходняй групоўкі войскаў пабітыя жывая сіла і тэхніка УСУ ў раёнах населеных пунктаў Краснае Першае, Сінькоўка, Масютоўка і Цімкаўка Харкаўскай вобласці. У раёне населенага пункта Навасёлаўскае Луганскай вобласці спыненая дзейнасць украінскай дыверсійна-разведвальнай групы.
— На Херсонскім напрамку нанесенае агнявое паражэнне жывой сіле і тэхніцы УСУ.
Усяго за суткі, паводле МА РФ, пабітыя 97 артылерыйскіх падраздзяленняў, жывая сіла і ваенная тэхніка УСУ ў 114 раёнах. Сродкамі супрацьпаветранай абароны ў раёне населенага пункта Адараўка Запарожскай вобласці збіты самалёт Су-25 Паветраных сіл Украіны. Перахоплены 21 рэактыўны снарад сістэм залпавага агню HIMARS і «Ураган». Знішчаныя 13 украінскіх беспілотных лётных апаратаў.
Інстытут па вывучэнні вайны: Крэмль вядзе інфармацыйную аперацыю па ачарненні Прыгожына
Лукашэнка, відаць, дыстанцыюецца ад угоды Прыгожына і Пуціна, якая была заключаная, як паведамлялася, з яго пасярэдніцтвам. Пры гэтым працягвае рэкламаваць сваю здольнасць вырашыць канфлікт, тым самым па-ранейшаму падкрэсліваючы слабасць Пуціна. Пра гэта гаворыцца ў свежай справаздачы Інстытута па вывучэнні вайны.
Эксперты звяртаюць увагу, што Лукашэнка дэманстратыўна заявіў, што ПВК Вагнера — гэта расійскае фарміраванне, а Прыгожын — расіянін, таму пытанні пра іх месцазнаходжанне варта адрасаваць не яму. Ён таксама паведаміў, што Прыгожын знаходзіцца ў Санкт-Пецярбургу або, магчыма, нават прыляцеў у Маскву раніцай 6 ліпеня.
Здольнасць Прыгожына свабодна перасоўвацца па Расіі дазваляе дапусціць, што той па-ранейшаму абаронены пэўнымі гарантыямі бяспекі і/або што Крэмль па-ранейшаму аддае прыярытэт падрыву яго рэпутацыі ў Расіі, а не фізічнаму ці юрыдычнаму пераследу, мяркуюць у ISW.
Як раней адзначалі ў Інстытуце, Крэмль пачаў інфармацыйную аперацыю, скіраваную на тое, каб прадставіць Прыгожына карумпаваным хлусам, і з таго часу расійскія дзяржаўныя СМІ актыўна распаўсюджваюць гэтую версію. Расійскія прапагандысты шырока асвятляюць ператрусы ФСБ у асабняку Прыгожына і паказваюць яго «багацці».
Аднак асобныя расійскія ультранацыяналісты раскрытыкавалі расійскую дзяржпрапаганду за спробы ачарніць Прыгожына, адзначаючы, што спроба Крамля пасварыць ультранацыяналістычную супольнасць з Прыгожыным не мела поспеху. Звязаны з «Вагнерам» тэлеграм-канал абвінаваціў МУС Расіі ў наўмыснай уцечцы ў СМІ кадраў рэйдаў ФСБ, каб паказаць Прыгожына здраднікам, якога цікавіць толькі марнатраўны лад жыцця. Іншы звязаны з «Вагнерам» тэлеграм-канал паспрабаваў абвергнуць версію тэлеканала «Расія-1» пра тое, што ФСБ магла знайсці наркотыкі ў асабняку Прыгожына. Асудзіў спробы расійскіх СМІ паказаць Прыгожына як карумпаванага чалавека і звязаны з Крамлём блогер, адзначыўшы, што дом Прыгожына — звычайны дом багатага чалавека. Іншы пракрамлёўскі блогер адзначыў, што дом Прыгожына не выглядае такім ужо раскошным у параўнанні з дамамі іншых расійскіх мільярдэраў.
Эксперты таксама звяртаюць увагу на тое, што расійскія блогеры ўсумніліся ў тым, што некаторыя аспекты расійскіх абарончых аперацый на поўдні Украіны могуць быць такімі эфектыўнымі, як іх раней малявалі расійскія крыніцы. Так, паводле сцверджанняў блогераў, расійскія мабілізаваныя, якія дзейнічаюць у Запарожскай вобласці, знаходзяцца на перадавой з кастрычніка 2022 года без ратацыі, бо іх няма кім замяніць. Гэта ўзгадняецца з ранняй ацэнкай ISW пра тое, што расійскім сілам, імаверна, не хапае баяздольных рэзерваў. Адмова праводзіць нейкую ратацыю, хутчэй за ўсё, прывядзе да хутчэйшай дэградацыі расійскіх фарміраванняў, якія абараняюцца ад украінскіх контрнаступленняў на поўдні Украіны. Іншыя расійскія блогеры абвінавацілі расійскія ўдарныя верталёты ў нанясенні ўдараў па ўжо знішчанай украінскай ваеннай тэхніцы і дапусцілі, што Мінабароны Расіі можа выкарыстоўваць гэта, каб завышаць страты УСУ. Раней Крэмль выкарыстаў паведамленні пра празмерна завышаныя страты ўкраінскай бранятэхнікі, каб паказаць расійскія абарончыя аперацыі як надзвычай эфектыўныя, нагадваюць у Інстытуце.
На што яшчэ звярнулі ўвагу эксперты:
- 6 ліпеня ўкраінскія сілы правялі контрнаступальныя аперацыі як мінімум на трох участках фронту і працягваюць рабіць намаганні, скіраваныя на паступовае знясіленне расійскай жывой сілы і лагістыкі;
- расійскія і ўкраінскія войскі нанеслі ўдары па лініі Сватава — Крамянная;
- візуальныя доказы пацвярджаюць, што па стане на 6 ліпеня ўкраінскія сілы прасунуліся на паўднёвы захад ад Бахмута;
- расійскія сілы працягвалі наземныя атакі ў раёнах Бахмута і Аўдзееўка — Данецк;
-
- украінскія сілы вялі контрнаступальныя аперацыі ўздоўж адміністрацыйнай мяжы паміж Запарожскай і Данецкай абласцямі і на захадзе Запарожскай вобласці;
- расійскія афіцыйныя асобы працягваюць ствараць атрады тэрытарыяльнай абароны ў памежных абласцях Расіі;
- акупацыйныя ўлады працягваюць спробы гвалтоўна асіміляваць украінскія прававыя і культурныя традыцыі ў расійскую сістэму на акупаваных тэрыторыях;
- Аляксандр Лукашэнка 6 ліпеня заявіў, што Расія перадасць Беларусі ўсе запланаваныя тактычныя ядзерныя ўзбраенні да канца 2023 года, калі не раней.