Урад Латвіі прыняў рашэнне не аднаўляць працу пункта пропуску «Сілене» на латвійска-беларускай мяжы 11 лютага. Пра гэта гаворыцца на сайце ўрада Латвіі.
«Вайну супраць Украіны, распачатую Расіяй і адкрыта падтрыманую Беларуссю, можна расцэньваць як дадатковую акалічнасць рызыкі і магчымую матывацыю для працягу намаганняў Беларусі па дэстабілізацыі сітуацыі на мяжы краіны з Латвіяй», — гаворыцца ў паведамленні.
Пры гэтым Латвія не стала падаўжаць узмоцнены рэжым працы памежнікаў, бо за апошні месяц фіксавалася мінімальная колькасць спробаў нелегальна перайсці мяжу.
Нагадаем, 19 верасня мінулага года Латвія закрыла пункт пропуску «Сілене» (з беларускага боку — «Урбаны»). Рашэнне было прынятае ў «сувязі з меркаваннямі бяспекі», з улікам «вялікай колькасці выпадкаў незаконнага перасячэння мяжы паміж Латвіяй і Беларуссю» і «неабходнасцю пераразмеркавання рэсурсаў».
Цяпер на мяжы Беларусі і Латвіі дзейнічае толькі адзін аўтадарожны пункт пропуску — «Грыгораўшчына».