Прысуд па гэтай справе нядаўна ўступіў у законную сілу ў Расіі, аднак адвакат беларускі, асуджанай за замах на забойства, звярнуўся ў суд касацыйнай інстанцыі з надзеяй дабіцца для сваёй падабароннай мякчэйшага пакарання. Выданне «Сильные Новости» расказвае жудасную гісторыю пра панажоўшчыну ў салоне прыгажосці.
Асноўныя падзеі развіваліся ў студзені 2021 года, калі ў горад Славянск-на-Кубані, што ў Краснадарскім краі, з Масквы на спадарожных машынах прыехала 53-гадовая грамадзянка Беларусі Вольга Жукевіч. У сталіцы Расіі жанчына жыла некалькі гадоў, на жыццё зарабляла нянькай, а ў мінулым была медыцынскім работнікам.
У дзень прыезду Вольга патэлефанавала ў мясцовы касметалагічны кабінет і запісалася на працэдуру шугарынгу (спосаб эпіляцыі з выкарыстаннем густой цукровай пасты. — Заўв. рэд.). На наступны дзень, 22 студзеня, беларуска зайшла ў салон з медыцынскай маскай на твары, у пальчатках і бахілах, што, як потым напішуць у прысудзе, «выключала яе апазнанне». Жукевіч быў патрэбны не шугарынг, бо ў яе сумачцы ляжаў нож, які яна і пусціла ў справу адразу пасля працэдуры. Вось як потым са словаў 36-гадовай пацярпелай была апісаная ў следчых і судовых дакументах сустрэча з кліенткай:
«Працэдура доўжылася хвілін 15−20. Пасля працэдуры яна адвярнулася, каб зняць пальчатку, а Жукевіч В.А. мусіла ісці апранацца, але падсудная назвала яе па імені, яна [пацярпелая] павярнулася і ўбачыла ў падсуднай у руках нож, які быў скіраваны на яе шыю. Пасля Жукевіч В.А. ўсадзіла ёй у шыю нож і разрэзала шыю. Яна спалохалася і пацягнулася па тэлефон, які знаходзіўся на тумбачцы. Але Жукевіч В.А. паваліла яе на падлогу і пачала засоўваць пальцы ёй у рот і душыць. Ёй удалося падняцца, але падсудная паваліла яе на канапу, і яна [пацярпелая] пачала крычаць, Аднак Жукевіч В.А. маўчала і з шалёнымі вачыма пачала яе душыць. Паміж імі працягвалася барацьба, у выніку яна спіхнула падсудную і пабегла да дзвярэй. Але Жукевіч В.А. не давала ёй магчымасці выйсці з кабінета, ёй удалося адчыніць дзверы, і яна выбегла ў калідор. Яе дагнала падсудная, прыціснула да сценкі, засунула пальцы ў рот і працягнула душыць. Пры гэтым падсудная адзін раз ёй сказала: „Заткніся, гэта ўсё!“»
На крыкі са сваіх кабінетаў выбеглі іншыя касметолагі, якія ўбачылі залітую крывёю калегу з прыціснутай да шыі рукой і невядомую жанчыну, якая «засунула пацярпелай сваю руку ў рот і цягала яе за ніжнюю сківіцу ад адной сценкі да іншай».
Спроба адцягнуць і затрымаць агрэсіўную кліентку поспеху не мела: жанчына падабрала з падлогі нож, пачала ім размахваць, а потым уцякла. Пацярпелую, якая сплывала крывёй, адвезлі ў бальніцу. Даўжыня нажавога ранення шыі злева склала сем сантыметраў.
«Названае пашкоджанне магло пашкодзіць жыццёва важныя органы», — адзначылі эксперты. А следчыя распачалі крымінальную справу пра замах на забойства. Санкцыя — ад 6 да 15 гадоў пазбаўлення волі. Імя меркаванай злачынцы стала вядомае толькі ў снежні 2021 года, аднак затрымаць яе не ўдалося, і беларуску абвясцілі ў міжнародны вышук. Як потым высветлілі, пасля нападу ў салоне прыгажосці яна з’ехала на радзіму.
Невядома, з якой прычыны, але ў жніўні 2023 года Вольга Жукевіч сама прыехала з Беларусі ў Славянск-на-Кубані, прыйшла да следчага і напісала яўку з павіннай.
Падчас следства высветліўся і матыў злачынства. выявілася, што беларуска жыла ў Маскве з былым мужам жанчыны, на якую напала з нажом у салоне прыгажосці. У пары пасля разводу склаліся непрыязныя адносіны што да выхавання дзяцей, а беларуска, зноў жа, паводле версіі следства, вырашыла з дапамогай нажа вырашыць праблему свайго каханага, але, як пішуць у пратаколах, «не змагла давесці свой намер да канца, бо ёй быў аказаны актыўны супраціў».
Характэрна, што падсудная з такой версіяй не пагадзілася, пацвердзіўшы, што жыла ў адной кватэры з былым мужам пацярпелай, маўляў, здымала ў яго кут, але факт сужыцця адмаўляла. Больш за тое, Жукевіч не прызнала сваёй віны ў замаху на забойства. Яе адвакат прапанаваў сваю версію таго, што адбылося: намеру забіць не было, беларуска прыйшла да пацярпелай на касметалагічныя працэдуры, падчас якіх раптам адбыўся слоўны канфлікт, які перарос у агрэсію ў дачыненні адна да адной.
«Гэты канфлікт адбыўся спантанна, што сведчыць пра адсутнасць намеру на забойства, бо за кароткі прамежак часу ён не мог узнікнуць», — настойваў абаронца ў апеляцыйнай скарзе на прысуд Славянскага гарадскога суда, які прызначыў пакаранне Жукевіч у выглядзе сямі гадоў пазбаўлення волі ў калоніі агульнага рэжыму.
Другая судовая інстанцыя прысуд пакінула без зменаў, а апеляцыйную скаргу — без задавальнення. Абаронца беларускі звярнуўся са скаргай у касацыйны суд у надзеі на змякчэнне пакарання. Скаргу зарэгістравалі, але даты разгляду пакуль не прызначылі.
У судзе другой інстанцыі абаронца настойвае на перакваліфікацыі дзеянняў сваёй падабароннай з арт. 105 на арт. 115 КК РФ (Наўмыснае нанясенне лёгкай шкоды здароўю з ужываннем прадметаў, якія выкарыстоўваюцца ў якасці зброі). Максімальная санкцыя — два гады пазбаўлення волі.